DREJTORIA E MARRËDHËNIEVE ME PUBLIKUN (MEDIAN) DHE ME JASHTË
Tiranë, 14.10.2022
Zëvendëskryetari i Gjykatës së Lartë Z. Sokol Sadushi merr pjesë në punimet e Konferencës së Kryetarëve të Gjykatave të Larta të BE, e cila zhvillohet në Brno, Çeki në datat 13-15 tetor 2022. Pjesëmarrja e Gjykatës së Lartë në këtë konferencë të nivelit të lartë, realizohet me ftesë të Presidentes së Rrjetit Znj. Bettina Limperg dhe Kryetarit të Gjykatës së Lartë të Republikës Çeke Z. Petr Angyalossy. Gjykata e Lartë ka statusin e anëtarit vëzhgues në Rrjetin e Kryetarëve të Gjykatave të Larta të Bashkimit Evropian prej nëntorit 2016.
Konferenca në Brno, e cila mbledh Kryetarët e Gjykatave të Larta të Bashkimit Evropian, trajton këtë vit dy tema kryesore: “Etika Gjyqësore, procedura disiplinore dhe përgjegjësia e gjyqtarëve” dhe “Si mund të kontribuojnë Gjykatat e Larta në besimin e publikut në sistemin gjyqësor?”. Gjykata e Lartë ka dhënë kontributin e saj për këto dy tematika dhe pyetësorët përkatës gjatë fazës përgatitore të konferencës.
Punimet e konferencës konsiderohen të rëndësishme për shkëmbim idesh dhe përvojash mes kryetarëve të Gjykatave të Larta. Konferenca drejtohet nga Kryetarja e Gjykatës së Lartë të Hollandës Znj. Dineke de Groot, Kryetari i Gjykatës së Lartë të Republikës Sllovake Z. Ján Šikuta, Zëvendëskryetari i Gjykatës së Drejtësisë së Bashkimit Evropian Z. Lars Bay Larsen dhe Kryetari i Gjykatës së Lartë të Republikës së Estonisë Z. Villu Kõve. Në përfundim të punimeve Asambleja e Përgjithshme e këtij Rrjeti do të trajtojë kërkesat e reja për anëtarësim.
Për kontakt: Ida Vodica Laska Drejtor i Marrëdhënieve me Publikun (Median) dhe me Jashtë Email: ida.vodica@gjykataelarte.gov.al www.gjykataelarte.gov.al
